Lo Departament de Cultura de la Generalitat de Catalonha, per mejan de la Direccion Generala de Cultura Populara e Associacionisme Cultural, es sòci del projècte PROMETHEUS e dirigís l’accion d’impulsar la celebracion d’un simpòsi internacional que meta en valor l’investigacion, la divulgacion e la transmission del Patrimòni Cultural Immaterial de las Falhas, Haros e Brandons al delà de las frontièras territorialas.

Concrètament, lo Departament de Cultura impulsa lo Simpòsi Internacional de las Fèstas del Fuòc dels Solsticis als Pirenèus, que se debanarà al cors dels jorns 27, 28 e 29 d’octòbre a Bagà, e amb la collaboracion de Cerdanyola, ambedoas populacions falhairas.

Lo Simpòsi vòl far aflorar la coneissença locala e internacionala mejançant la recèrca e los estudis a l’entorn de las fèstas del fuòc dels solsticis als Pirenèus. Investigacion e divulgacion transfrontalièra per somar d’esfòrces, d’arguments e per far mai fòrta la representacion dins la Lista del Patrimòni Cultural Immaterial de l’Umanitat.

Lo prètzfach primordial dempuèi l’inici del projècte es estat la coordinacion entre sòcis e amb los diferents actors del territòri dels 3 Estats membres del projècte PROMETHEUS, per tal de crear un Comitat scientific territorialament representatiu, paritari e que foguèsse un rebat de la diversitat culturala e sociala qu’englòba lo mond falhaire.

Aquel Comitat es format de representants institucionals e expèrts de França, Andòrra, Aragon e Catalonha. Eles son estats los encargats de desvolopar l’orientacion e lo contengut del Simpòsi.

I aurà una primièra conferéncia inaugurala que farà balanç dels 5 ans de la candidatura de la part de la declaracion de l’UNÈSCO. Coma se pòt veire en detalh dins l’apartat correspondent del web e dins lo programa, i aurà 4 encastres que tractaràn l’organizacion e gestion territoriala de la Falhas, Haros e Brandons, la transmission e las estrategias de salvagarda, las escomesas de la gestion culturala dins lo territòri pirenenc e/o tanben lo transferiment e divulgacion del patrimòni amb la presentacion d’entitats, musèus, libres e publicacions en relacion. Per mejan de conferéncias, comunicacions e taulas redondas òm poirà expausar subjèctes divèrses coma per exemple los novèls actors, protocòls, modèls e ressorsas organizativas, aital coma novèlas aisinas per s’acarar a problematicas ligadas a la COVID, la repercussion dins los mejans de comunicacion, la sostenibilitat e futur de las fèstas, etc. S‘articularà amb agaches transversals, amb experiéncias d’autres sectors e encastres culturals e de territòris de pertot del mond.

En parallèl, se creèt entre 2019-2020 un Comitat organizatiu, format per representants del territòri, lo Departament de Cultura de la Generalitat de Catalonha e la Comuna de Bagà, amb la collaboracion de Cerdanyola e la rèsta de sòcis del projècte.

En causa de la situacion de pandemia, s’an adoptat totas las indicacions de las autoritats sanitàrias e se prendràn totas las mesuras de prevencion de besonh. En aquel sens, lo format del Simpòsi serà dual, de manièra presenciala e telematica. Òm a coordinat l’estructura, organizacion e logistica del Simpòsi per’mor que se pòsca desvolopar amb totala normalitat dins lo territòri del Berguedan.

L’assisténcia al Simpòsi es gratuita, mas cal realizar l’inscripcion prealabla a las jornadas, fach qu’a l’encòp entraïna poder obténer un certificat de participacion.